Boroitat Toxe Nastat?

Boroitat Toxe Nastat?



1994 vorsant ‘Dulaara’ hindi filmantlem git “meri
pant bhi sexy, meri shirt bhi sexy”, kollejik vetelea
tornnattea modim bhouch famad zal’lem. Hem git
bosintlea tape rekodir vazoitokoch tornattim bhettench
umedichea lharamcher ufetalim. Mud’dom apnnalea
kensank hat lavop. Hacho orth, “mera baal bhi sexy”,
cheddvannim vonttank hat lavop “meri vontth bhi sexy”,
kulleank hat lavop mhonnchem, fuddlem tunvem somzochem

Ek dis Ponnje savn Moddganv ievpak bosichea fuddlea
darantlean bhitor sorlom ani itlean bos suttli. Ek
tori sitt rikami asa kai mhunn bosbhor nodor
bhonvddait ravlom. Sogllim sittam bhorlelim. Fokot ek
tornnatti choli boslelea sittar anik ekleak bosunk
svat asli. Hanvem thoim mhoje kulle tenkounk chintlem.
Mhaka pollevn te cholien beg-begim aplo lens thoim
dovorlo. Rikami sittar lens dovrun, hi tornnatti kitem
sangunk sodtali kai? “Hey rumaal bhi sexy hai?”

Mhojea eka ixttachi ken’na ani koxi vollokh zal’li
ti iad iena, punn ken’nai to mhaka vatter mevlear
zapoilea xivai ravona. Mhojea bholaikechi ani
kuttumbachi khobor ghetana fattlea sattoleachea
paper-ar vo mhoineachea masikar chhapun ail’le lekh-am
vixim don gonttam sangun aplem mot dilea viret
vochona. Tech porim dor sumanant Goa-world.com ani
Goanet-ar Aitaracheo Kaskutleo tachi bail vhodda
gosttan chukoinastana vachta mhunn mhojem vornnon
korit sangta.

Sonvsar bhor ximpoddlelea Goenkaram modim Konknni
maim-bhas internet-a velean jivi dovorchi oxem mhaka
dislem ani hanvem kovita borovpak chalu keleo. Poili
kovita ‘Pavsachea Ratri’ 17vi Julh 2001, Goanet-ar
choddoili. Tea uprant ‘Aitaracheo Kaskutleo’ sankoll
Julh 5, 2003 vorsant suru keleo ani him borovpam ojun
chalu asat. Mhojea borovpam vixim lok kitem uloita
kai? Ken’na, ken’na ho prons mhaka sotaita. Choddan
chodd oxem mhonnpi astele. “Ho poi ollxig borovpi.”

Aizver mhojea borovpan hanvem konnachich vaitt monan
ttika marleli na. Zori mhojea borovpan hanvem dukh
dinastana ken’nai chimpto kaddpacho iotn kelo zalear,
to tunvem aplea angar dukhavoll korun ghenvchi nhoi
mhunn tujea thaim nomrutaen magttam. Kaim zannanim
mhaka xikko marla. Mhoji bhorpavoll ‘double meaning’
aslea xivai xevottachea panvddear pavona mhunn. Kitem
mhonnnonk sodtai? “Mera likhaan bhi sexy hai?”

Vatter mell’lele pavtti sodanch mhoji khobor ghetolo
mhojo ixtt eka disa poilech khep aplea bailea vangdda
Super Market-an mell’lo. Tannem apnnalea bailechi
vollok korun ditna mhojea borpavollicho itihas uspilo.
Hanvem tichea hatak mhojo hat melloitana mhonnllem.
“Tujo nhovro (ghorkar) sangtalo mhaka. Mhojim borovpam
tuka avoddtat mhunn”

“Tujea borovpa velean hanv sodanch somzotalim tum
dispan ek bouch ‘sexy’ monis astolo mhunn. Tujo xant
ani movall sobhav dakholl korta tujem mon sap dovorun
tuje lekh boroita. Tuka mellun hanv hevui-i nirnnoiar
pavlim. Boroitat toxe monis nastat mhunn”

Mhojea vixim tichem soroll (straightforward) mot
aikun mhojem mon dadhoslem. Tika kitem tori sangun
distalem ani tem sangpak lokan bhorlelo super market
zago nhoi aslo. Dekhun mhojem tondd bond dovrun hanv
monantlea monantuch udgarlom.

“Hem tujem sarkem ge. Mhojem mon 'sexy' nhoi. Punn
kitem korum? Magelem 'pen' mat sexy..... Ham!!”


Lino B. Dourado
http://www.goa-world.com/goa/poems/