Monday, January 21, 2008

MHOJEA BHURGEAPONNAILIM NATALAM

MHOJEA BHURGEAPONNAILIM NATALAM
- Bonaventure D'Pietro

Zanchea bolsak duddvanchi ubh asta, tankam Novembracho mhoino mhunnlear fuddlea mhoineant Natalam ietelim, te porbek ievkar diunk koslim nhesnnam korchim; khuinchea dorjeak apouncho; konnak-konnak 'Christmas' karddam dhaddchim, osleo, ani anik zaiteoch ievzonneo ankun dovorpacho mhoino asta. Punn mhojea bhurgeaponnar mhaka team donui, mhunnchem Novembr ani Dezembr mhoineancho kosloch sombond naslo mhunnllear zata. Natalam lagim pavlim mhunnon mhojea monar uzvadd ietalo, jedna Outubr mhoineantlem gormechem vathavoronn boldi zaun, sokallchi thonddi suru zata tedna. Ganv bhanv-bhoinnamni oxem somzunk zata, ki hi thonddi okosmat Abril-Mai mhoineamni porian lagleli tor, atam Natalam lagim pavleant mhunnon hanv ghoddiek chintolom aslom. Mhojim Natalam avomonacher tharovlelim, mhoineancher nhoi. Goribanchim Natalam tim!

Natalanche porbek mhozo ievkar mhunnllear, jinnos rongacheam folinchem borem-xem ek nokhetr korop. Heo rongit foli tedna videsant thaun ietaleo-xeo mhaka dista. Teo patoll-patoll astaleo khoreo, punn nokhetracheam boddiank gom' laun teo chittkaitana, kitleo-i oddleo zalear, teo oddttaleo. Atancheam folim porim matxeo subej oddleo zalear, 'fus' korun tancho kuddko pinzon tujea hatant ieta tosleo nhoi. Atam, heo folli nokhetracheam boddiank chittkaunk vo dosounk tedna bazarant fevikol vo dusro koslo dosovpacho jinnos mellta zalear mhaka khobor nasli. Kiteak mhojem 'fevikol' mhunnllelem, khuinchi-i eke kajichea zhaddar don-tin suvatancher koite marun tika ghavo ghalop. 10-15 disamni tam ghaveantlean dhik bhair sortalo. To kaddun haddop ani udok misoll korun patoll kortoch, ek bhes-borem gom' (gum) toiar zatalem. Punn atam nokhetram korunk konnak sosnnikai asa? Ani tim zai tori konnak? Bazarant zai toslim, zai tedim ani rongit 'ready made' nokhetram melltat.

Mhunnttoch, mhojea bhurgeaponnar mhaka ani mhoje piraiecheam bhurgeank Natalanchea somoiar nokhetram korpachi humed asli, ti aiz virgollun geli. Te gozalin atam kanniechem rup ghetlem.

Toslich humed Natalancho Ghotto korun tantunt Saibinn, Sam Juze, Ballok Jezu, gorvam raknne, mender ani Teg Rai-anche puttle ghalpachi kaim bhurgeank humed astali. Konn-konn bhurge khas apleam hatamni xetantli mati kaloun teo murteo kortale. Tea kallaile amche igorjentle padri konnacho Ghotto boro zala taka inamam divpachi spordha dovrinasle khore, toruipunn dusreancheam Ghotteam poros aplo Ghotto odhik sundor korcho mhunnon bhurge ap-aplea vanttean bhar ghetale. He Ghotte korunk te vot ani savlli mhunnon pollenastanam dongrancher zollpotale. Aiz tem soglem somplem. Bazarant amkam zai tosle ani zai tede ghotte melltat. Toxeoch ghotteant dovorpacheo murteo vo puttle.

Natalancho kusvar korop hi xekdde vorsam adli porampora. To korpant amcheam avoianchi mhunnon humed kedi! Aiz Ditozager korum-ia zalear, faleam Brendager, Porvam Aitaradis, (kiteak tem kamak veta) Anitager. He porim adinch dis markar korun dovorop. Atam hevui chalicher ilo-ilo visor poddot veta. Karann: bazarant tor jin'sam torencho kusvar toiaruch mellta. Konn-konn posorkar astat te apleak ogllem graik mellunk zai mhunnon adim-fuddem duddu farik korxi zalear, justuch Natalanchea disa kusvar tujea ghora lagim funkott pavoupachi seva jahir kortat. Mhunntoch, teo ratti ani konn gheun bostolo?

He porim adhunik kallar munis-jinnechi poinn mottvi ani mottvi zaun veta. Mottvi zaunk na ti eka-mekak lagim sorpachi vatt, ullot zalear ti lamb-lambuch zaun veta. Ti mottvi zaun mogak-mog ani moipasak-moipas doddlea puro mhunnon Ballka Jezu kodden magum-ia!

No comments: