(Saibinn Mai-k Ami Kiteak Man Ditanv?)

JEZU ANI ANKVAR MARIA
(Saibinn Mai-k Ami Kiteak Man Ditanv?)
- Fr Nelson Antao, sfx

Bapachem karia purem korunk, hea sodvonnechea ghuttacho vell pavlo tednam, Dev eke ostorek Ankvar Mariek vichun kaddta ani tika hea Aplea Putachi Avoi korta.

Ballok koso ho Devacho Put jietanam ani uzvaddachi vatt tanktanam, Ankvar Maria Taka sangat dita. Tichem kam' zalem nhuich fokot Taka zolmak haddumk ani 'atam mhaka kiteak poddlam' mhunnunk, punn To ticho khas Put zata. Tachea hatak-hat ghalun taka jivitachi vatt tankunk ti Taka aplo sangat dita. To sanddla mhunn dista tedna, Devacho Put Taka Dev polletolo mhunnun soddinam. Juze sangati ti Taka sodunk veta.

30 vorsam pasun Jezu he aple avoi sangati jieta. Aplea 3 vorsamchea kamantui hi avoi tachea sangata asa. Ani khursachi vatt pasun he ankvar Mariechea mogachea sangatan, To aple kuddiche oskotaient, punn mogachea bollan, hi khursachi vatt urben tankta.

Aplea bhurgeacho zolm dis eke avoik bhov motvacho. Choddd-xem amchem lokx zolmak ailelea bhurgeacheruch asta. Bhurgem zolmota tednam ani ami bhettek vetanv tednam, amchea monant he bhurgench asta, kiteak taka ami poilech pavtt hea sonvsarant polletanv. Tea bhurgeachi avoi amchea monant asli ti, zolma uprant amkam bhurgem chodd mogachem zata. Avoi zanna, kitem hea bhurgea khatir tinnem soslem tem ani hea tichea koxttank tika bhugeacho foll favo zalo mhunn. Punn ami dusrim sogllim fokot hem folluch polletanv ani zaite pavtti avoik visortanv. Zolm disa somoiar ami bhurgeak vhodd veng martanv ani tea bhurgeak zolmak haddtele avoik kainch nam, odik zalear amchim kallim tonddam. Ixtt aplea ixtt-mitrache 'birthday-ak' vetat, punn tea ixttak zolmak haddtele avoik kednach bhettonant. Ek bail aplea ghovak tachea zolm disak khup khuxal dovrunk apleachean zata titlem korta, taka vhodd 'present' bhi haddta. Punn tea aplea ghovak zolmak haddtele avoik tea tichea vhodd disak xirapta. Ti bail tem dennench polleta, punn tem dennem koxem favo zalam tem visorta. Him zaun asat kallim kupam amchea kuttumbant ani aiz amchea monxam sovem vagnnukent.

Jezucho zolm dis ami somorombhteleanv, punn amchea jivitant he Tache avoik khuimchi suvat ditanv kai?

Ami dukh bhogtanv tednam ani dukhint addovtanv tednam, amchea tonddar poilemch utor 'Maim' vo 'Avoi' ieta. Hem mun'xachea soibantuch asam. Tech porim akhi Povitr Sobha amche 'Sorgimche Mai-k' ulo marun novea vorsak survat dita. 1ler Janerache ami 'Ankvar Mari -Devachi Avoi' hi porob somorobhtanv. Hea poileach disak Saibinnichi Porob kiteak dovrunk zai asli kai? Hem dakoita amchem AVOICHEM MOL amchea jivitant. Aiz Jezu sangata amkam-i vengent dovrun vaitt-vignnantlim sambhall mhunn he Avoik ulo marum-ia.