Oxich ek Chitt................... Daniel F. de Souza

Oxich ek Chitt……

by Daniel F. de Souza dannyboy04@rediffmail.com

Mogall Ballka Jezu

Zaitea kallan anik ek pautt tujea zolma somoiar hi chitt tuka borovpachi hanv sondhi ghetam ani mhojea monna-kallzantlim bhavnnam, khonti-huske, tuka ugddape kortam. Somzotam tum tancher tujem lokx ghaltoloi ani favo te bhaxen kaim prosn tujea mhukar manddleat tankam suttave kortoloi.

He chittichi survat korpakuch hanv matso fattim-fuddem zatam karann khuincho vixoi gheun ti survat korchi hoch mhaka motto prosn poddla. Punn kaim nezo, somzottam tum mhoji oddchon mandun ghetoloi mhunn ani khuim mhojem chuklam-sandlam zalear tem tum somzun vhortoloi mhunn.

Hi chitt tuka borounk ekuch karann mhollear amche Goenche poristhiticher tujem thoddem bhov lokx oddun haddunk. Aiz amchem sobit sundor Goem okosmat eka mottea vaddoll tufanantlean zoddpota. Hanga hea amchea dhaktulea goeant aiz kitleo atveoch ani niallunk zaina tosleo ghoddneo ghoddttat. Poile suvater sangchem mholllear, aiz amchim lhan bhurgim hanga bilkul surokxit nant. Tancher hot’teachar zata, tanchi moriad surokxit nam karann hanga aiz antrea poirean lhan xallek vetoleam bhurgeancher legun bolatkar zata ani hea bhurgeanchi fulti jinn bhavon veta. Vhaddlolea cheddvank ani bailankui hanga surokxit bhovonk ani somazant jieunk favo ti mekhllik ani surokxa nam. Tancherui bolatkarachem ani hot’teacharachem kallem kup posorlam. Konn kedna konnacho ghat gheit hem niallunk ani chintunk zaina. Karan aiz Goenchem vattavronnuch sap bodol’lam, karann hanga hea goeant goenkaracho ankhddo disan-dis komi zait veta ani ‘Bhaile’ hanga yeun aplem raj choloitat. Bolatkaram vangdda khun krimicho ankhddo dor disa vaddot choddot veta.

Aiz amchea Goyant amchea xiklolea tornatteank favo ti zodd asloli nokri mellonk khub moskil zalam. Goyant karkhanneanim nokreo asat teo chodd xeo bhaile yeun hanga sthan korun amcheo nokreo gheun bosleat. Xikon bekar aslole amche tornatte aiz torekvar vesonnak boli poddleat, zoxe porim soreachem, ani vikhalleam vokhdanchem. Aiz nokri mellonam zaun zaite amche put Portugez pasaporti korun Evropak gheleat aplea pottachi bhuk marpak ani jivitachem udarposonn korpak. Goenchea putam dhuvank goyantuch ravpak ani aplem jivit folladik korpak favo teo sovloti nant, dekhun porki desanim vochun thuim porkeanche gulam zaun nokreo korcheo poddttat. He babtin tor dor ek nivllun haddlolo Goycho sorkar asvasonnach diet aila…ani azun meren hem tanchem dhoronn zobor xem bodlunk nam. Asvasonna xivai amchea sorkara koddlean anik vhoddlem-xem dusrem kaim diunk zaina.

Zaite amche tornatte jivitacho rosto chukon ani ghorant favo tem margdorxonn naslolean vikhalleam okhdanche gulam zaun duddvanche axen tallnent poddun aplea ixttanche khun legun korpak pavleat ani aplem ani aplea ghorabeachem nanv chiklant uddoun mekhlle zaleat. Aiz amchea goeant ixtt-ixttanchech khun kortat ani ixttagoticho bhandpas kochreachea dobeant xevttun martat. Hem tuka goddiek vichitr distolem, punn hem jivem soth. 25 vorsam fattim aikonk naslele kauz ani ghoddneo atam amchea goeant disa-dispottim ghoddun yetat ani hem sogllem vachun kallzak borich dukh bhogta. Hem oxem kiteak ghoddtta ani hacho zababdar konn hacho zabab mellpak kottin zalam. Aiz anik ek khontichi gozal aikun yeta mhonnttat ti mhollear amchem Goem ek xindullkichem vhodd moidan koxem zalam, zuim xindullki ani kuddicho dhonddo nettan ani zobordosten cholta. Hanga kaim vattharanim porki ostoreo legun bonvdekaranchem rup gheun hea kanttaleachea dhonddean misoll zal’leo asat Hem oslem kuddichem dadhosponn bhogpak zaito Goeam bhailo bhonvddekar hanga lall’leoun yetat ani uprant aple kuddichi ast bhagoun zali mhonntoch hi amchi povitr bhuim bosttaun vetat. Hantun zaite goenkar bhav-bhoinn legun misoll zal’leo asat mhunn tuka borovpak mhaka loz dista. Osle mezgotin Goem atam Asia-chea mapar Bangkok ani Pattaya sarkem ek ‘Paedophilia-chem ani xindullkechem’ zolltem akhttem mhunn ontoraxttrik mollar porke Goyan-k ollkhotat ani her desantle bhovddekar atam amkam sokoile nodrent polletat. Hem sogllem noxtt ani kanttallo Goychea doria deger aslolea vattharanim posorlam ani hachi pallam her kaim zageancher legun pavot asat. Zaiteam hangacheam tornatteancher ek chaltich nodor marlear kalliz dukhta….…tanche churchure distat. Tum goddiek mhonnttoloi hanga kaido nam kai mhunn?? Asa, kaiddo asa, punn kaideache rakhonnddar zaite pautt ‘aikon bhere dison kurdde’ oslem sovong kortat, dekhun kaiddeacho konno moddla, kaiddo ophangull zala.

Atam amchea goeamkaranchea hatin ogllo poiso-i bi gholltat ani zaite fautt hea oglleam duddvancho goemkaranim goir faiddo kaddla. ‘Night club’ ani her pozoddponnam choltat tea zageancher vochun kaim zannanim kuddik khotti khoxalkai duddvani vikot ghetlea. Hea night-club-anim zobor xe tornnatte-tornattinch nodrekh zollkhotat. Vikhalleam okhddancho dhunvor hanga tornatteank guspottaun marta. Adlea kallar ami TB ani Typhoid he don torenche marekar rog asat mhunn aikol’lem, zankam sompo voizuki upai naslo. Punn atam ani ek rog bhitor sorla ani to mhollear AIDS. Goeant tor he piddent koxtovtoleancho ankhddo khub unch pavlla ani disandi nove nove tornne kankadde he piddeche xikar zatat. He piddecher ilaz nam hem khobor ason toriastana konnak kainch poddun vochunk nam. Mouza ani vounddavnne xivai hanga dusrea kiteakuch orth nam. Dor ektto apleak zai-zai te bhaxen miroita ani mouza marta. Uprant uxir zatoch mat chittunk poddta. Aiz zaiteam avoi-bapaiche besarmaiek lagun tanche bhurge hati bhair pavleat ani tanchea ghorabeanim odruxtt bhitor sorlam. Zaiteam avoi-bapaink bhurge ason nam zaleat. Hem sogllem 450 vorsam adim Sam Francisk Xavier-an kirsti dhorm porgottlolea mannkullea Goyant ghoddtta!

Aiz amkam amchea Goyant zantteak favo to respet man nam. Avoi-Bapui xapai-xemai zanttim zalim mhonntoch tankam tanchea ghorant zago asona, tankam vhorun rokddinch khuim tori pois ajilani kivam madrinchea ghoranim bhorti kortat ani tanche nimanne dis tannim hanga eksurponnant oxech sarche poddtat. Aiz kitlinch tornattim cheddvam patkache tallnechim xikar zaun anvkar astanach avoi-ponnacho bhes bhogunk pauleant ani uprant hea patkache savllent zolmant haddlolea bhurgeank vhorun onath ashramanim bhorti kelleant. Hem amchea aichea somazachem vhodd durdoiv. Tea xivai anik kaim asat jim hi patkachi savlli koddek kaddunk kusveant ghorb sambhaul’lem foll ghorbpat korun Devachi rochnnam sonvsaracho uzvadd polleunchea adinch khun korun tankam nattak kortat ani tanchea rogtachea papachim zababdari zatat. Oslea papan aplem hat ani bottam niropradi bhurgeachea rogtan misoll korunk kaim amche dotorui ontoskornacher patt korun duddvanche axen oslem khottem kortub adharunk pattim ravonant. Hem sogllem oxem ghoddtta karann aichea monxan noitik totvank uzeant lasun tancho gobor kela ani denvcharachea bhulovnneak fuddo korun aplem jivit jieta.

Anik thodde bhov motte prosn aiz Goeank disan-dis sotaitat zoxe porim SEZ, kochro, (garbage), Casinos, bekarponn, nollachem udok, apa-lipa khellti bizli, khondd poddlole roste ani tancher obghati mornna, halto-dolto-oskot zal’lo amcho sorkar, broxttochar, fottingponnam, divorce, disan-dis vaddti on-Goykaranchi sonkh’kea, lipincho prosnn, adi, adi, adi. Punn, hem sogllem bariksannem borovnk anik zaitinch pannam vetlim, dekhun he babtin kitem sangchem asa tem hanv tuka porxim bhett diunk yetlom tednam ami dogui sangatam bosun hacher barik cheorcha korchi.

Te meren hea voir ul’lekh kel’leam prosnnak mat favo to ilaz niallun dovor ani tum yetai tedna to matso Goyant vevharant ghalunk fuddakar ghe. Hem kam anik konnach dusrea kodden zait oxem mhaka bilkul bhorvanso nam….nizacho Goykar niraxi zala….khub dukhovla, khonttovla….…..tachea kallzache ghai dhuvun kadd ani tujea mogan te pekoi. Amchea Goychi novsornnim kor….ani taka ek novem jivit di. Karann amchem Goy soglleam odruxtantlem vattaunk Tuje poddvecheruch thorlolem asa, karann amchea Goychem anik konnak poddun vochunk nam……nhoi mhunn ami nivllun haddlolea sorkarak legun………Aam Aadmi mhunn gharannim ghalun amchea kannak jitim vaingim bhandleant….tim tum katrun kadd ani dor ekleache amche kann dolle ugodd mogalla Ballka Jezu.

Tumche poddvecher ani borea mogacher visvas thevun tujea Dev yenneak axeun ravtam.

[Ho lekh Dezembr 2007 mhoineachea Gulab ankar porgott zala]