NATALAMCHI TOIARI

NATALAMCHI TOIARI
- Orlando D’Souza

Nenttim zanttim, umedicheam pavllamni, hanga thuim bhonvtat,
Aplea hatant gheun pontteo, voir korun dolleam-bauleo, mhatareo kitem sodtat
Tonn vaddlam , bat kirlon ailam, uncle sodta tem mellonk na mhunn bejear zala
Anjeacho paktto moddla, vag xinv mendre mevleat, punn babulo sanddla
Lighty pik pik zatat teo, khuim dovorleai go, untty hem ani tem dovllita
Aiz tor mellona, ghottoch korina, vorsachea-vorsa oxench zata
Mainchem firlam, kor'ret bhurgeamni sanddoilam, aiz nevreo kortat
Cheddean kaiborem, noketr kelelem pattlea vorsa, aiz kaichekai kelam govan
Hanga thuim durgam, khonddkulam poddleant, mati ghalun bhorunk apoila
Itlo despez zala, torui resped khuim asa, porbo nakaxeo distat.

Todd'doki to dorji, pirdear keli makxie, kitem ghaltelim tem somzona
Orxim boro xinvtalo, he pautt khuincho devchar boslo mhunn konn zanna
Ietana govan moche haddleat, punn dhaktte zatat, hea vorsa flop Natalam
Ekui vost sarkhi zaina, koslim soitanponnam, lokachim polleunk zatat tonddam
Aiz bhaili toeari, zaunk na mhunn fikir vhoddli, Atmeachem kitem kelam?
Rochnnar Dev amcho, zago sodta gorib ghottea sarkho, To bhailem rup pollena
Iea vellar, Jezu ubho asa amchea darachea umbrear, Taka zai amchim kallzam

Bhaili toeari korunk tum khup harpit zala, haka lagon Devak kitem zai tem tum visorla, Sorvesporacho marog toiar korat, tacheo vatto nitt korat mhonnun Bhagevont Juanv oronneant bob marta, sobar pautt tunvem tallo aikola, punn tuzo guneanv na, kiteak soitanan tuka somzunk diunkna. Tache boldek tuka tujea durgantlim khonddkulam bhorunk laileant. Zaiti toieari poixili tunvem keleai, thoddeo vostu korunk zaunk nant dekhun tum porbecher vajelai. Sobit sundor ghotto kelai tonnacho, sodun sodun Balkacho putlo kaddlai ani tea gotteant dovorlai. Toxench pattlea vorsa keleleim, oxem vorsachea vorsa kortai, punn Jezu gotteant ravonk sodina, to tujea kallzant ravonk sodta, Tor borim Natalam zaunk amcheam kallzanchim daram ugddum-ia ani gotteant nhoi, punn amchea kallzamni Jezuk gheum-ia ani eka mekak khuxalbhorit Natalam mhunn porbim dium-ia.